الموظف المتمرد

 الموظف المتمرد 

تعالى بقى اقولك ياعم المتمرد آخرة التمرد دا ايه فى نظر مديرك 

تعالى اقولك انت ليه اصلا بتتشاف بانك متمرد وانت بتبقى شايف نفسك عندك حق 

تعالى اقولك ليه بيضحوا بيك انت فى الاخر وبتحس بالظلم الشنيع اللى بتتعرضله من مدير ناقص 

تعالى اقولك صفات الموظف المتمرد وامتة بيكون متمرد وليه اصلا بيكون متمرد 

بمنتهى البساطة الموظف المتمرد دا هو الموظف اللى بيبان أنه مش عاجبه حاجة .يعنى مش عاجبه طريقة الشغل ولا عاجبه النظام ولا عاجبه التارجت ولا عاجبه طريقة مديره ولا عاجبه كمان زمايله اللى بيكونوا تابعين وبيقولوا حاضر ونعم وخلاص 

من الاخر الموظف المتمرد دا بيكون فعلا متمرد على اغلب الحاجات اللى التابعين بيكونوا موافقين عليها عادى عشان ياكلوا عيش .وخلينا نركز على كلمة عشان ياكلوا عيش 

ايوة فى كل شركة كدة وفى كل تيم بنلاقى شوية تابعين بيقولوا حاضر ونعم وخلاص سواء النظام والإدارة سليمة أو غير سليمة سواء التارجت منطقى أو غير منطقى سواء فى مدير بيفهم أو مدير حمار اصلا .هما شوية تابعين ملتزمين الصمت خوفا من التهديد وقطع العيش .خايفين على أكل عيشهم من الاخر ودول إنتاجهم بيكون على قدهم اصلا بيقولوا حاضر ونعم عشان عارفين أن دا انسب حل وان سهل الاستغناء عنهم لأن قدراتهم قليلة واجتهادهم قليل أو عاوزين يكبروا دماغهم من الاخر .واهو اهم حاجة بنقبض اخر الشهر 

وفى نظرى الشخصى لو الفئة دى في منها كتير فى أى شركة أو إدارة اعرف انك مدير فاشل ومش عارف تشغلهم ومبسوط بطاعتهم فقط ولكن دول مش بتوع انتاج وتطور 

والموظف المتمرد عكسهم تماما .هو موظف مجتهد جدا ودايما عاوز يطور من نفسه ومن شغل ونظرته للشغل اكيد مختلفة عن نظرتك كمدير وعشان كدة انت بتشوفه متمرد وبتحاول بكل الطرق تخلص منه رغم انك لو قدرت تكسبه هاتكسب من وراه أضعاف انتاج التابعين 

الموظف المتمرد بيعترض على طريقة الشغل اللى مش بتناسبه وعنده أسبابه لو سمحتله يتكلم هايقنعك بيها لو عاوز تساعده وتمشى الشغل .

بيعترض عشان مركز فى شغله وعارف عواقب الطريقة والنظام اللى انت عاوز تطبقه وعارف هو هياثر معاه فى ايه وازاى لانه بيحسبها كويس .الموظف المتمرد هاتلاقيه مش بيضيع وقت وبيحاول يستغل اى فرصة عشان ينجز شغله فى اسرع وقت وبافضل كوالتى .هاتلاقيه بيضغط على نفسه اكتر ما انت ممكن تضغط عليه وعشان كدة هاتلاقيه مش بيسمحلك تتكلم معاه أو تسمعه كلمة متعجبهوش .هاتلاقيه بيتكلم فى حقوقه طول الوقت لانه بيكون مديلك حقوقك على أكمل وجه .هاتلاقيه مش بيتفاعل مع اى اجتماع هرى انت بتعمله لانه عنده حاجات اهم بيعملها وبيرتبلها .هاتلاقيه بيركز على المشاكل وبيقولك افكار لحلها ونتائج الحل دا لو حضرتك بس ساعدته فى الحلول أو على الأقل قدرت أفكاره ومحاولاته 

هاتلاقيه بيدى كل حاجة حقها وعشان كدة يحب هو كمان ياخد حقه .هاتلاقيه مصدر خطر علي اى مدير فاشل مش عارف يشتغل ولا يشغله ويستغل مهاراته وأفكاره والمدير الفاشل دا هيحاول بكل الطرق يخلص منه خوفا من تأثيره على زمايله 

يعنى المدير الفاشل هيخاف من أن الباقين يعملوا زيه فبالتالى مش هايقدر يسيطر على التيم فلازم يتخلص منه بأى طريقة ..رغم أن دا اعتقاد خاطئ جدا 

الموظف المتمرد يعنى موظف بيفهم وبيعترض وعنده افكار وعشان كدة بيعترض ومش عاجبه.موظف مركز وعاوز يشتغل وينتج ويطور وعشان كدة مش عاجبه 

الموظف المتمرد هو أول موظف بيطفش وبيهرب من اى بيئة عمل ملوثة بمدير فاشل معندوش اى فكرة عن الإدارة وبقى مدير بالفهلوة والتطبيل والعصفرة وقلة الادب 

وهو أول موظف بيكون ضحية فى اى بيئة عمل مفيهاش إدارة ولا نظام وعلشان مش بيعرفوا يتعاملوا معاه ويستغلوا مهاراته ممكن يمشوه أو يطفشوه 

فى النهاية لو عندك موظف متمرد وفيه كل الصفات دى حاول تسمعه وتشغله وتستغله وتقدره وساعتها هو كفيل يخليك تستغنى عن باقى القطيع 

لو انت مدير حقيقى هاتبقى فاهم كلامى كويس 

ولو انت موظف شايف نفسك متمرد حاول تدور على بيئة عمل تناسبك واوعى تمشى مع القطيع وتتحول لتابع.كمل اجتهاد وتعب وطور من نفسك واكيد هاتوصل للمكان اللى يقدرك ويقدر تعبك

#شوية_ادارة

#HR_شاطر 

#marina_adel