اتش ار امين

 كلمة لكل الاتش ار المحترمين اللى بيكونوا مسؤولين عن التعيين واختيار الموظف المناسب للوظيفة المطلوبة 

من فضلك وانت بتختار .ملحوظة صغيرة

انت بتكون عارف كويس جدا ايه العيوب والمشاكل الموجودة فى شركتك 

بتبقى عارف شركتك حلوة الى اى مدى ووحشة لاى مدى 

بتبقى عارف اكتر حاجة فيها ممكن تطفش الموظفين 

بتبقى عارف الوظيفة دى محتاجة مؤهلات وخبرة قد ايه 

بتبقى عارف تحدد مين اكتر حد مناسب للوظيفة دى .

لان بمنتهى البساطة انت الوحيد اللى بيكون عندك الصورة كاملة تجاه شركتك ومشاكلها ومميزاتها والوظيفة كمان وتفاصيل الشغل وطبيعته فيها بغض النظرعن وجود انترفيو تكنيكال بيكون مع مدير الإدارة 

ولكن مش عيب ولا حرام تكون انت كمان عارف وملم بطبيعة الشغلانة وتفاصيلها 

وانت كمان الوحيد اللى بتكون عارف ظروف المرشح للوظيفة وعارف خبرته ومؤهلاته واكتر حاجة ممكن تقف قدامه واكتر حاجة هاتبسطه فى شركتك 

ايوة انت الوحيد اللى بتقدر تشوف الصورة كاملة وانت الوحيد اللى تقدر تحدد هل الشخص دا فعلا هاينفع ويستمر ولا بعد شهر او اتنين هايكتشف أنه مش قد الوظيفة ومحتاج تدريب وشغل كتير 

أو هايكتشف أنه اتخدع .واتضحك عليه وكان فاكر أنها فرصة عمره لحد ما اتفاجاء أنه فى أكبر واسخف مقلب وأنه مش فى المكان اللى ينفع يكون فيها ولا مع الناس اللى ينفع يتعامل معاهم ولا عمره هايكبر ولا حتى يقدر يمارس خبراته اللى بقاله سنين بيجمع فيها 

ودى مشكلة بتواجه ناس كتير اوى بيتبعالهم عيوب الشركة فى شكل مغرى جدا  فى الانترفيو من خلال الاتش ار العظيم اللى المفروض عارف كويس جدا أنه هايظلم الشخص اللى هايجيبه .حتى لو المرتب مناسب 

أو هايظلم الشركة اللى ممكن تصرف كتير على موظف معندوش الامكانيات المطلوبة .بس دا قليل اوووى 

يا اتش ار قبل ماتقرر تشتغل الشغلانة دى وقبل ما تبقى مبسوط انك بتعين حد شاطر اوى فى قسم من الاقسام عشان يتقالك ايه دا انت جيبته منين دا .ايه دا شاطر اوى 

لا وكمان جاى على مرتب كويس .قليل .مناسب لينا 

قبل ماتفرح بكل الكلام الحلو دا خلينى اقولك أن الموظف دا لو محترم هايكتفى بالدعاء عليك طول الوقت لحد مايهرب من الصندوق الاسود اللى هايبلع خبراته بسببك 

وهايفضل طول الوقت حاسس أنه اتخدع واتضحك عليه وضيع وقته .

لأنك ضيعت عليه فرصة تانية افضل لو كنت سيبته يركز فى طريقه كان ممكن يكون فى مكان افضل من اللى عندك ومن اللى انت بعيتهوله .

أو كان يفضل فى الشركة اللى هو فيها لحد مايلاقى مكان افضل يناسب تطوره .مش تاخده من سابع دور لحد الأرض فجاء وتفقده الامل فى نفسه 

أنا عارفة أن اللوم مش كله عليك يااتش ار يامحترم 

فى جزء كبير برضو على الموظف لانه المفروض كان يسأل كويس عن الشركة وعن كل التفاصيل اللى ممكن يتعرضلها

ودا هانتكلم عنه فى مقال آخر 

يهمنى هنا امانتك كا اتش ار فى اختيار واستقطاب موظف 

من فضلك خليك دقيق جداا فى الاختيار الانترفيو عملوه عشان تتكلم مع المرشح وتعرف كل التفاصيل اللى انت محتاج تعرفها عشان تساعدك فى الاختيار 

الانترفيو عملوه عشان تقدر تحدد هل الشخص دا مناسب فعلا وهايستمر ولا هايتعين وشهرين ثلاثة أو حتى سنة وهايمشى عشان انت لعبت على احتياجه للوظيفة .

واحتياجك انت كمان ليه ليشغل مكان فاضى عندك وتحقق التارجت بتاعك 

ارجوك خليك امين مع كل مرشح انت قررت تعينه .مفيهاش مشكلة لما تعرفه على كل المشاكل اللى ممكن تقابله ويسلام لو تقترح عليه بعض الحلول ليها أو على الأقل طريقة للتعامل معاها .

مفيهاش حاجة لما توضحله بمنتهى الأمانة حالة الشركة وتسيبه هو فعلا يقرر هل هايقدر يستحمل ويكمل ولا لا 

على الاقل أنه لما يتصدم بالواقع يحاول يتعامل معاه بدون مايحس أنه اتخدع أو أنه مظلوم 

خليك امين مع المرشحين زى ما بتحاول تنجز مهامك المطلوبة

خليك اتش ار شاطر واكسب المرشحين زى ما بتحاول تكسب شركتك 

#marina_adel

#خليك_انسان

#شوية_ادارة