زى مابتدورى على شخص يهتم بتفاصيلك ويسمعك ويحبك وتعيشى معاه لحظات حلوة
دورى على راجل يقدر يواجه اى مشكلة ويحارب عشانك ومعاكى مش يحارب بيكى ومع اول قلم يجرى ويهرب ويسيبك
دورى على راجل وصل لمرحلة النضج والعقل الكافى اللى يخليه يقدر يقيم المواقف والمشاكل ويقدر يخطط ويرتب لبكرة.
ويقدر ياخد القرار السليم فى الوقت السليم
دورى على راجل فاهم أن حياتكوا انتوا الاتنين ليكوا انتوا الاتنين مش ليه هو لوحده .
القرار بتاعكوا انتوا الاتنين بعد حوار ومناقشة طويلة للوصول لحل مناسب مش قراره هو لوحده وبس عشان هو الراجل .
دورى على راجل عنده استعداد يحارب عشانك مهما كانت حجم المشكلة وخطورتها وتهديدها على علاقتكوا
سواء كانت المشكلة ظروف وأزمة مالية يعنى مثلا معندوش القدرة الكافية يعيشك فى وضع ترفيهى أو حتى معندوش القدرة الكافية يجيبلك شقة بمليون جنيه .مهما كان الوضع العظيم اللى عاوزين تكونوا فيها لو مفيش بينكوا الحب والتفاهم والسند الحقيقي هايبقى ملوش لازمة
أو مشكلة وقت او علاقات أو حتى أهل
حلو الحب وحلوة اللحظات الجميلة اللى بنعيشها مع بعض وحلوة التفاصيل والكلام الحلو والهدايا وحلو أننا عاوزين نكون مع بعض .
بس الأحلى أننا فعلا نبقى عاوزين ونعمل المستحيل عشان نوصل لدا لأن مفيش حاجه سهلة
واللى بيجى سهل بيروح برضو سهل
دورى على راجل يقدر يشيل ويواجه ويحارب قبل ما تدورى على راجل يحب ويدلع ويقول كلام حلو لأن كلهم بيعرفوا يعملوا كدة لكن مش كلهم بيعرفوا يبقوا رجالة يتسند عليهم
تعليقات
إرسال تعليق