شركة طاردة للكفاءات

 كنت دايما بشوف صاحب الشغل اللى بيحاول يكره الموظفين فى بعض دا .كائن غريب ومريض 😳😳

ومازلت شيفاه مريض الحقيقة بس بقيت فاهمة ليه مريض وعارفة نتيجة مرضه دى هاتوصله لايه وليه هو مريض 🤔

دايما صاحب الشركة اللى ربنا كرمه يعنى وبقى صاحب شركة بيبقى عنده هاجس أن اى موظف لسة صغير دا ممكن يسرقه أو يكبر على قفاه أو يخسره حاجات فى الشغل .

فطبيعى يعمل ايه بقى صاحب الشغل عشان يضمن أن ولاء كل الموظفين راجعله هو وبس.

يعمل حركة محدش بياخد باله منها غير اللى بيفهم بس 

يكرههم فى بعض يخليهم كلهم يفتنوا على بعض ويوقعوا بعض وياسفنوا فى بعض عشان هو اللى يكون عنده كل المعلومات من كل وجهات النظر ومن كل الاتجاهات 

ميبقاش فى فرصة للموظفين يحبوا بعض ويشيلوا شغل بعض أو يحلوا مشاكل الشغل مع بعض 🤷🤷

فبالتالى كل موظف هاتلاقيه شغال مع نفسه بيحاول يتجنب اى مناورات مع زمايله بيحاول يتجنب اى اخطاء او حوارات ممكن يدخل فيها 👌

بيحاول يقدم جزء بسيط جدا من اللى عنده عشان لو أبدع فى الشغل ممكن يغلط ولو غلط هايتفتن عليه ويتعلق 

أو يتخصم منه أو يسمع كلام هو فى غنى عنه 

بتلاقى كل موظف بيحاول يخلص مواعيد شغله ويهرب بيهرب حرفيا 🤷🤷

بيهرب من جو المخابرات والمراقبة والتجسس الدائم اللى 

هو موجود فيه طول الوقت 🤦

حتى لو زمايله هايفتنوا عليه وصاحب الشركة مش هياخد

 اى اكشن تجاهه وهايعمل نفسه مسمعش ومعرفش 

فكرة انى ابقى عارف أن كل كلمة بقولها بتوصل دى 

فحد ذاتها لعينة 🙃

وياريتها توصل زى ماهى ميبقاش فى تجويد من زمايلنا المتقنين للتجويد 🤐

طب تعالوا كدة نعرف نتيجة دا ايه ومميزاته ايه وعيوبه ايه 

هو ليه مميزات ايوة طبعا ليه 🤔🤔

مميزاته الوحيدة انى كصاحب شركة احس انى عارف كل حاجة وعارف كل كلمة بتتقال من وراية وابقى انا المتحكم الوحيد فى شركتى عشان اقدر اتوقع واعرف الضربة هاتجيلى من مين وهاتعامل معاها ازاى وابقى دايما جاهز بأى خسارة واى مشكلة هتواجه حلمى وشركتى 🤔

وجهة نظر طبعا 🤷

خلينا بقى نعرف ضريبة الامان المزيف دا ايه 

اول حاجة .هاتفضل طول عمرك واقف عند ليفل معين فى النجاح مش هاتقدر تتخطاه ابدا .👌

لان بمنتهى البساطة قتلت اى ابداع ممكن يظهر من اللى بيشتغلوا معاك 🤷

تانى حاجة .هاتلاقى نفسك طول الوقت مشغول بكلام فاضى .كلام فاضى حرفيا .🤦

بتسمع مشاكل وبس محدش هايديك اى حلول لأن كل الموظفين بيحاولوا يهربوا من تحمل مسؤلية اى مشكلة تظهر فبالتالى كل موظف هايتفنن ازاى يدافع عن نفسه بالأدلة عشان ميلبسش هو المشكلة .👏

ومفيش اى حلول ومحدش بيحل ابدا ولا حد فاضى يفكر فى حل كلهم واخدين وضع الدفاع المستمر وجاهزين

 لاى هجوم ومحضرين الأدلة للدفاع 💪

رغم أن الحل وارد يكون واضح جدا ولكن محدش هايفكر يقوله اصلا .

وحتى لو اتقال هايفضلوا برضو يهروا فى نفس المشكلة ويضيعوا وقت فى اى الهرى عشان ميشتغلوش 

لانهم اساسا مش مهم يشتغل المهم يهرب من اى مشكلة 

وافضل طريقة للهروب هى عدم الشغل 

خد بالك زى ما انت بتتفنن ازاى يفتنوا على بعض بدون ماكل واحد فيهم يحس أنه وحش أو أنه بيكره صاحبه أو بيفتن عليه 

هما كمان بيعرفوا يتفننوا ازاى يشغلوك ويسحلوك فى مشاكل هبلة جدا عشان يشتغلوا بمزاجهم مهما كانت درجة الرقابة عليهم 

كل دا ممكن يكون بيحصل بشكل غير واعى منك كصاحب شركة ومن الموظفين اللى عندك اصلا 🤦🤦

ايوة متبقاش عارف انك بتسحل نفسك وهما مبيبقوش عارفين انهم منساقين وراء الهرى اللى انت عاوزه وبس وبيتعاملوا معاك على أن هو دا الصح وانك انت عاوز كدة واحنا بنقبض المرتب عشان بنعمل كدة فاشطا عادى مدام الشركة عاوزة كدة 

بالمناسبة الناس الشاطرة واللى عندهم ضمير ميكملوش معاك سنة او اتنين بالكتير وبيهربوا تماما فى اقرب فرصة حتى لو اقل منك ومش بيفضل عندك غير العينة اللى انت عاوزها وبس 

البس بقى يامعلم 🤣🤣

#شوية_ادارة 

#marina_adel 

#خليك_انسان 

#Hr_شاطر