يعنى ايه مسوغات تعيين ؟
مين اللى بيطلب مسوغات التعيين؟
امتة بتتطلب منى ؟
منين الورق دا ؟
وايه اهمية مسوغات التعيين ؟
مسوغات التعيين
هو الورق اللى بيطلبه منك الاتش ار اللى عملك الانترفيو
بعد ماحضرتك قدمت على الوظيفة اللى شوفت اعلانها وتم تحديد معاد الانترفيو
وبالفعل عملت الانترفيو مع الاتش ار واتقبلت الحمدلله
بننقل لتانى خطوة وهى ورقك اللى انت المفروض تحضره وتقدمه للشركة عشان تنضم معاهم فى الشركة وتبدء رحلتك فى الشغل
طبعا لو انت لسة متخرج جديد ومتعرفش يعنى ايه مسوغات تعيين بتحس انه طلب صعب اوى وبتفضل محتار ودايخ ومش عارف تعمل ايه
قبل ماتعمل اى حاجة لازم الاول تتاكد ان البطاقة بتاعتك معاك وسارية لانك هاتحتاجها كتيررر .........ياريت تصورها اكتر من نسخة وامشى بيهم دايما
اول ورقة فى مسوغات التعين
1*اصل شهادة الميلاد
حضرتك بتتوجه لاقرب سجل مدنى تابع لمنطقتك وتطلب منهم استخراج شهادة ميلاد ....حضرتك بتدفع الايصال وبتستلم الشهادة وانت واقف
يفضل تستخرج اكتر من نسخة لانك هاتحتجهم فيما بعد
2*اصل شهادة الخدمة العسكرية (اصل شهادة التجنيد )
بتتوجه لاقرب مركز تجنيد تابع لمنطقتك
تقدر تعرف اقرب مركز تجنيد تابع لمنطقتك من خلال موقع القوات المسلحة
www.tagned.mod.gov.eg
وتتبع خطوات استخراج شهادة التجنيد
وطبعا لو الشهادة دى ضاعت منك بتقدر تستخرج بدل فاقد ليها مرة تانية
3*اصل شهادة المؤهل
بتقدر تستخرج اصل شهادة المؤهل من المكان اللى حضرتك اتخرجت منه سواء معهد او كلية او مدرسة
بتتوجه للشؤن الخاص بالكلية وتطلب استخراج شهادة المؤهل وبتدفع الرسوم المطلوبة وبتستلمها
4*البرنت التامينى
لكل واحد فين بمجرد مابنتولد بيكون لينا رقمين
1*الرقم القومى اللى بيكون موجود فى البطاقة اللى حضرتك بتستخرجها عند اتمامك للسن
2* الرقم التامينى اللى حضرتك بتحتاجه لما بتقدم على وظيفة ويتامن عليك
الرقم التمينى دا حضرتك تقدر تستخرجه من اقرب مكتب تامينات تابع لمنطقتك
تقدر تعرف اقرب مكتب تامينى تابع لمنطقتك من خلال الموقع دا
www.nosi.gov.eg
بتتوجه لمكتب التامينات وتطلب البرنت التامينى الخاص بحضرتك وبالفعل بيتم استخراج ورقة بها الرقم ومختومة
5*كعب العمل
ودا بتقدر تستخرجه من اقرب مكتب عمل خاص بمنطقتك
تقدر تعرف عناوين مكاتب العمل من خلال موقع وزارة القوى العاملة
www.manpower.gov.eg
او من خلال الهوت لاين 19486
بتتوجه لمكتب العمل ويكون معاك الاوراق دى ضرورى
بطاقتك طبعا
اصل شهادة الميلاد
اصل الجيش
اصل المؤهل
البرنت التامينى
البرنت التامينى
وطبعا كل الورق دا تكون مجهزه قبل ما تعمل كعب العمل وعشان كدة انا اتكلمت عنه بعد ماجهزنا كل الاوراق دى
موظف مكتب العمل بيتطلع على كل الاوراق دى وبيكتبلك الاستمارة ويسلمهالك وانت واقف
6*نموذج 111 للتامين الصحى
بتتوجه لاقرب تامين صحى تابع ليك او اى تامين وبتطلب منهم استمارة 111 تامينية
7* 6 صور شخصية 4*6 خلفية بيضاء
خدبالك ان الصور اللى انت هاتقدمها دى هى نفس الصورة اللى هاتظهر فى id بتاعك داخل الشركة
وهى اللى هاتكون موجودة على الميل بتاعك وزمايلك هايشوفوها
فيفضل تختار الصورة اللى متبقاش متضايق وانت بتتعامل بيها
8*كارنيه مزاولة المهنة لو انت دكتور او اى مهنة محتاجة تصريح لموظفيها
9*كارنيه النقابة لو حضرتك تابع لنقابة المحامين او المهندسين او غيره
10* اخلاء طرف من الشركة القديمة
لو حضرتك كنت شغال فى شركة وسيبتها
بتطلب من الاتش ار فى الشركة القديمة انه يستخرج اخلاء طرف يثبت عدم وجودك معاهم
11* استمارة 6 تامينية
بتاخدها من الاتش ار فى الشركة اغلقديمة بعد مابتقدم استقالتك ويتم اخراجك من التامينات الخاصة بالشركة القديمة دى
ودا ما يثبت انك غير مؤمن عليك ليتم التامين عليك فى الشركة الجديدة
........................................................................................................
بتجمع كل الورق دا وتحفظه فى فايل وتقدمه للاتش ار ويتم كتابة العقد للانضمام معهم بالشركة
وتبدء شغلك وبالتوفيق فى رحلتك الجديدة
.................................................................................................................
#شوية_ادارة
#خليك_انسان
#HR_شاطر
#المدير_البرنس
#تنمية_بشرية
#ادارة_الموار_البشرية
#شئون_العاملين
#اتعلم_HR
#التطوير_الذاتى
#مهام_HR
...........................................................................
https://fb.watch/6CJRvay2g7/
لينك الفيديو على صفحة الفيس بوك
تعليقات
إرسال تعليق